Ba wasti hob krodi.

"am Knopf am Anzug drehen"

Verzeiht ich musste erst meinen galaktischen Übersetzer einschalten

ICH KOMME IN FRIEDEN

Ich gleite so durch die Galaxie

Als ich eier Erd do sie

Un denk bei mir was e primitiver planet

Als mei ultragalaktischer Lachsensor an geht

Weil bei mir dehem uff em Planet Fasenacht

Werd es ganze Johr nur gelacht

Un mir dun durchs ganze Weltall ziehn

Das mir Leid mit neie Witze grien

So hab ich vor Monate in eierm orbit Stellung bezoh

über die Endscheidung war ich richtich froh

Ei was Ihr fa luschdich Völkche sinn

Ei des grien mir dehem noch ned e mol so hin

Ich hann gelacht, das Träne sinn komm aus meine Aue

Ich du jo meine Ohre ned traue

Kaum war eier 11.11 im leschde Johr rum

Ware die erschde schun e bische dumm

Die prunksitzung is angesaa

Die dolle wäre gar ned do wäre beinah fordgefahr

In Urlaub wollte die gehn

Ei Ihr Tanzkollege finde des gar ned scheen

Doch Sie is sich kenner Schuld bewusst

An dem Urlaubsdaa Sie doch gar ned Tanze muss

Es geht hin und her bis dene wird klar

Das die im falsche Kalenner war

Un es stellt sich e raus

Die Mama gebt ned es richtiche Datum aus

Do musst ich schun wieder lache

Was mache die fa Sache

Ich glab die sin e bische vewirrt

Hann sich doch glatt in de Woche geirrt

Wäre enie Woch später erschd zum feiere komm

Ei do hätte se ganz allen die Bühn erklomm

Natürlich losse se Urlaub falle aus

Und feire mid uns im närrische Haus

Ich hoff des passiert dene nimi so bald

De Familie von Hauswald

Doch we na denke das jetzt alles in Ordnung gehd

Kann ich nur saan -  weid gefehld

Nur noch wenige Stunne bis zum Beginn der Show

Alle sin se natierlich schun do

Was e gelaffs un e gerenne,

des dun ja jo all kenne

jeder muss noch was erledige oder suche

dud sich selber schun vefluche

hann ich alles was ich brauch do am ort?

Oder muss ich noch e mo ford?

Ob Strumpfhose oder Perick oder Schuh

Hoffentlich grie ich es Kleed noch zu

Un natierlich was daff uff kene Fall fehle

Des was na alle Johr dunn wähle

Wenns fehld kommd de Ries Klaus

Und hold glei sei Straffzettelblock e raus

De Jahresorde is doch klar

So wie hald jedes Jahr

Do is es hald bled

wenn ma ned zum 11. 11. gehd

Ja de Daa so wie heit

Wo ma sich als Fasenachter schunn lang druff freit

Jetzt hama do enie

Die war an dem erwähnde Da ned do

Also had se an de Prunksitzung dene vun leschd Johr angezoh

Aber Mäde das war richdig mies

Du ziech doch a ke Schuh vun ledch Johr an Die Fies

Is hald e Mäde vum Land

De meischde als Trixi bekannd

Dud die gud Luft in Walshause genisse

Unsere Straßner Beatrice

Unser Verein gehd jo a mid de Zeid

De Compuer macht sich immer weider breid

Jeder had e E-Mail Anschluss dehem

So die Kommunikation viel schneller dud gehn

Die Jugendleiterin plant die Kinnerfasenacht

Und is mid Sorge uff gewacht

E Plakat muss a noch her

Des is jo ned schwer

E email geschickt ans Sabrina schnell

Die kann jo helfe gell?

Korz druff is des gewünschde do

Zuerschd is de rischdich froh

Wolld de Zettel schun kopiere un vedeele

Do dud se an de uffmachung doch was queele

Des is jo es programm wie leschdes Johr

Des kommd ra jo komisch vor

Un dann was muss se do enddecke

Sogar im Datum dud e Fehler stecke

Ja was soll dann des do sinn?

Gried unser Frau Glas noch nedemo e enfaches Plakat do hinn?

Sie ruft an un dud mo hefdisch doobe

Statt wie erwartet zu loobe

Unser Sabrina kommt gar ned zu wort

Des gemeckere geht immer weiter und fort

Erschd mit Hallo und sei mo still

Kann se der saan was se will

Basse mo uff und her ma mo zu

Dann grien ma des geklärt in ruh

Natierlich is do druff alles vedreht

Weil jo do a ums Plakat vun leschdjohr gehd

Ich denk du bisch e intelligendie Fraa

Un dir wird glei klar

Programm abgeännert un uffs Datum vun diesjohr gehen

Schunn wär alles gud und scheen

Do wird es Mareike blass

Alles Müller oder was?

Upps des is jo vekehrt

Des jo nur noch uff Grünagel hehrt

Allee Hopp dun ma laud rufe

Wenn ma de goldene Schlüssel vun de Stadt dun suche

Ziehe durch die Fussgängerzon mit närrischem tarar

Das jedem wird glei klar

Die Narre sinn uff em Vormarsch zum Rathaus hien

Wo se die macht iber die Stadt wolle grien

Nadierlich sin do a all vum CGH debei

Ned nur weils Esse und Trinke is frei

Ma will die Fasenacht feiere mid alle Zweebrigger Narre

Will tanze singe un a lache

So gehd de moin vorbei in nu

Bis de OB sperrt es Rathaus zu

E paar feiere weider am e anere Ort

E paar misse Heem drum fahre se ford

Hem ins Ernschwiller Land duds gehen

Weil do isses jo werklich scheen

Fahrd gemiedlisch Iber die Humbeuer Stross

Ei heid is jo gar ned viel los

Dud faschd sei Haus schunn zien

Als er vun de Seit e Stoss dud grien

Es rappelt korz es Auto bleibt stehn

Nix me dud do gehn

Ja was sin dann des fa sache

Ebe dun mir am Rathaussturm noch lache

Jetzt e Unfall un des ziemlich flott

Es Auto is enfach nur noch schrott

Un ke schuld hat er is jo klaar

Ne es war es aner Audo, drin hugt e Fraa

Wollt schnell noch was inkaafe do sa ich nur top

Pech fa unser Andreas Kopp

Ich hoff nur er war menigstens satt wor an dem Daa

Mid so paar Brezel des jo ned so enfach war.

Schaffe schaffe Häusle baue

Und ned no de Männer schaue

Des mus so heese ich machs eich klaar

Do gehds um e Fraa

Die baut mid Ihrm Freidn zusamme ihr neies Neschd

Un werklich die helfd do rischdich feschd

Ob abreise putze un renoviere

Die dud sich vor nix scheniere

Is hald nur e bißche tapisch bei mansche sache

Wenns ned so bleed wär mist ich jo lache

Sicherheit am Bau noch nie gehert

So hat die mit Turnschuh gekehrt

Schritt zurick und Aahhh dud se schreie

Schunn dud de Bese uff em Bode leie

Sie hupst uff en Been durch de raum

Was do passiert des glaabsche kaum

Die dreht uff so e Brett wo e Nagel guckt enaus

Schun laft es Blut aus em Schuh eraus

Schnell e Veband an geled

Zum Glick die zum Doktor schaffe gehd

Doch Krankenschein kansche vegesse, die had jo noch e gesundie Hand

Weil heid die Farb soll noch an die Wand

Los gehd geschwind mid de roll

Ei des klappt doch richtig doll

Is jo vum Wuchs her ned gross eher kleen

Doch mid ra Velängerung duds escht gud gehn

Zum Farbintunke is die Gress ideal

Do is des Bicke ke grossi qual

Plötzlich guggt se sich um wie von sinne

Die sucht was un duds ned finne

Had ener mei Handy weg genomm?

Do sin ausem Farbemer paar luftblose komm

So e Farb hann ihr noch ned am e Handy gesiehn

So was zu kaafe ihr nirgends dunn grien

E wunnerbarie pastellfarb so richtig lieb

Doch des Handy macht jetzt noch nedemo me piep

Veheirat was an dem Da noch nett

Drum kann ich es saan ganz nett

Wer macht sei Handymid de Farb do nass

Eh Mareike alles Müller oder was?

Jetzt sinn ma schun mo bei alles Müller oder was

Ich sie do were klei mehrere blass

Ich flieh so iber ernschwiller ganz in Gedanke

Do sie ich das a Mensche misse ab und zu tanke

Doch ned ihr Audo was eigentlich macht sinn

Sondern die leere de Treibstoff in sich selbst e nin

So e gelbie Brie mid Schaum obe druff

Un wenn se mo angefang hann herre se nimi uff

Sitze de ganze Da in komische Heiser

Do werds immer lauder und ned grad leiser

Manche hann sich schwarz weiß angezoh

Un sinn mid bunde Beem durch die Stroße gezoh

Alle sinn heider un werklich froh

Die Ernschwiller Kerb is wieder do

Un de schende Daa am Kerbetreibe

Ist de Kerbemondaa un soll a so bleibe

Euer weibliche Spezies is jo do de fier bekannd

Die hann de Mondaa zu Ihrm Daa ernannd

Sitze schun firh in dene Spelunge

Un losse sich beim drinke ned lumpe

Vernüftig aber jeder Zeit

Wenns zuviel wird hann die glei zu esse was bereid

Bestelld werd Senioredeller hald so kleene

Wer viel dringt braucht sich mim esse jo ned queele

Trotzdem grien se 2 Schnitzel pro Fraa

Was fa de Velauf der Geschichte echt gud wahr

Weils so fein war un richtig wech

Sie losse inpacke des gud Stick flesch

Gehen  a noch in die neschd Kneip un ned heem

Es is hald grad so scheen

Die neschd Werdschaft wird angeloff

Un a kräftig noch gesoff

Es dauert ned lang un denne werd klar

Es muss was passiere sunschd sinn se bald nimi da

Brot muss her so viel wie se grien

Des angeblich de Aklohol  aus sem Blut dud ziehn

2 Körbcher voll die dun vun de Tische klaue

Un motze a noch es wär so drugge des kenschde kaum kaue

An dem Disch hugge a noch Spenlersch und unser Ex es Marilien

Vun dene die es Brod dunn grien

E Brezel mit Lätta des wer Eichjetzt wohl rechd

Ei negschd Johr bringe ma was mid des wär wohl es beschd

Do falld dene Siedendheiss inn

es leid jo noch e Schnitzel in unsrer Dasch a drin

ruck zuck ausgepackt un scheen in Reiderscher geschnidd

jetzt feld eigendlich nur noch e bisje Dipp

So hugge die Dame bei ihrm Gaumeschmauss

De Werd duds ned ziehn un so werfdse a kenner raus

Ausweise aus Ernschwiller sold ma die beide

Solle sich doch wo annersch da ums Brod sich streite

Aber hald des gehd jo gar ned

Weil in Auerbach stehd dene Ihr Bed

Zigeiner dunn sich a werklich ned so benehme

Jetzt will ich se noch beim Name nenne

Es Petra Schwarz im Haugge Lui sei Schwiegertochterin

Un es Müller Silke, so jetzt stehn a do drin.

Wenn ich so dursch des Weltall flieh

Gugg ma an die ganz Galaxie

Hann ich so e Ding an Bord

Do veirr ich mich nie bin ich nah oder weid ford

E Navigationcontrollcomputermaschien

So was han Ihr noch ned gesiehn

Ach was des gebds bei Eich a schun uff de Erd

E Navi, das ma ned fard vekehrd

Jetzt bin ich vewirrt un gug ganz dumm

Wieso fahre Ihr dann als so dled do e rumm

No Wachenheim wollde se hin dord an de Weinstroos

Packe Ihr Kinner in un fahre mim Audo loos

De Kurpfalz Park is es jo a werd zu besuche

Am Schluß dunn die ganz schee fluche

Weil Wachenheim gebs a noch im Zelletal

War fa die hald ned erschdie Wahl

Gud die komme dord aan im falsche Ord

Doch der Park war enfach ford

Fahre durch alle Stroße und alle Ecke

Wie beim e Umzug, wies sich geherd far närrische Jecke

Was wird dann do mid uns gespield

Die hann sich schunn vearschd gefiehld

Do werd des noch e mo mim Navi probiert

Wo se jo hadangeblich  vekehrd gefiert

"30 km nach Süden" kommd so aus dem Gerät

Plötzlich des richdisch gehd

Ei e Computer kann nix fa die falsche Sache

Die Ihr Bediner vekehrd mid ne mache

So finne se dann do noch Ihr Ausflugsord im helle

Un es is so scheen das kenner dud me schelle

Jetzt wolle na wisse wer des war

De Glase Nico mid Kinner un Fraa

Telefon klingeln

Moment, Moment,was  is dann jetzt uf e mol los,

jetzt klingelt ah noch mei Handy do in de Hos.

Hallo ich bin hier und wer is dort,

ja ja ich bin schun vom Planete fort.

Ah ja, ne komm, des is joh mol widder e Knüller

Do hasch noch was erfahr vun zwee leit namens Müller.

Mmmh, zwee annere ware noch debei,

los verzähl ma des abber glei.

Am Fasnachtsumzugs in Kaschdel is des passiert,

wie do is denne was vum Auto abgeschmiert,

die hans noch net e mol gemerkt unn sin weitergefahr,

des ware zwee Männer, na des war mir joh klar.

Angehal sin die wohr, uff de Heimfahrtsstreck,

die Leit hanne gesaht, deDeko Orde is gefloh eich weg.

Na des is joh werklich mol e Hit,

die zwee Pappnase im Auto kriehn des gar net mit.

Wie du ah, klar, nadierlich, ich wers denne gleich mol sahn,

Michael Böhm un Steffen Müller, mache es nägschde mol e Spanngurt dran.

Ja genau mir zwee mache jetzt mol Schluss,

weil ich joh noch die annere Geschicht erzähle muss.

Entschuldigung, dass mei Handy hat gerappelt,

un dass ich hab so lang gebabbelt,

aber wie ihr siehn, war des mei Spionagent,

der hat ah noch zwee scheene Geschichte gekennt.

Böhm un Müller war der ende Teil gewehn,

in der anner duhts aber ah um Müller gehn.

In korze Stichpunkte will ich’s eich erkläre,

wie zwee Fraue ihr auto duhn quäle.

Fortgewehn-Heemgefahr-gebabbelt un de bei im Auto gesess,

Scheibe uff zum Raache un es ausmache vum Licht vergess.

Zum Abschluss dun se noch e mo schee lache

Beim anlasse duds nur noch rrr rr mache

Wer sei Auto had hald liebd

Der schiebd

Wolles ned stehn losse das nix passiert

Die Scheib is jo uff un ohne Strom die ned pariert

So siche 2 mo schwitze

Die gee iber aussem Gefängnis mache schun witze

Abber es gehd dann werklich los

Kupplung gedreht, Hand am Schlüssel so gehds runner die Stroß

Un alls se Tempo han so richdich speed

ma se im Auto handiere sieht

Kupplung komme geloss un schun war se aan die Karre

Halt! ned bei dene jetzt kommt der part mim lache

Zurick, die Rolle de Berg erunner un sinn in Gedanke schunn im Bed

Aber losslose die Kupplung mache die ned

Trede so feschd uff des Pedal, im Blech dud schunn e Beul enstehn

Stattdesse wie wild de Schlissel die dunn drehn

Rrr rr dunn se nur herre un halle an Ihr Geschoos

Jetzt stehn se wieder in de Baustell am Gefängnis in der Stroos

Ei de Führerschein sollt ma ne abnemme

Un statt desse e Roller unner de Hinnere klemme

Do kenne se noch soviel klage

Do wo se jetzt stehn darf ma ned page

Totale Haltevebot und so siehd ma se wieder schiebe

Die misse Ihr Audo werklich liebe

200 meter berg uff sins jo nur

3 mo misse se Pause mache bis se sinn aus der Fahrspur

Es Fenschder gehd dann doch no zu e Loblied do druff singe

Schunn hede se kenne die Nacht im Audo vebringe

Amm nächschde Daa nadierlich e Mann muss se rede is jo klar

Unser Vorstand kommd mim Iberbriegungskabel angefahr

3 Minute un schunn war die Sache gess

Aber ned vun uns vergess

Beide ex prinzessinnen aus unserm Verein

Es Marylin und es Mareike do hugge se ganz fein

Fa Eich dunn mir die I phone Macher un de ADAC uff suche

Die solle doch mid alle mittel mo vesuche

E App zu enwickle des ma uffeier Handy lade

Dann kenne na es Audo mit ra SMS in Zukunft starte

A als intelligentes Wese fun em fremde Planed

Ohne zu Esse es bei mir a ned gehd

Un da ich ned uff jedem Stern e MC Donald finn

Pack ich ma immer e Notration inn

Am liebschde was süsses wie Kuche

Bin ich mo ohne fang ich glei an zu fluche

Jetzt denk ich ich bin do am rischdische Ord

Bei dem Angbot an Gebacktem geh ich nimi so schnell ford

Erschd ledschd bei eierm Second Hand Basar

Ach was e Auswahl enfach wunnerbar

Kuche in alle Sorde un größe

Des wer fa mich was gewese

Doch hama do zwee in unserer Runde hugge

Ich sieh se schun schwer schlugge

Mir bringe a e Kuche do were na Aue mache

Do denge na des were Zauber sache

Mutter und Tochter in em Haus

Ihr kennes eich denke do kam nix debei eraus

Es wird de ganze Da geschaffd

Alle zutate zusamme geraffd

Die Forme ingestrich un gefilld

Die mache beide wie wild

No Stunne die Mutter is noch ganz gelasse

Als de Backofe uff machd kannses ned fasse

Grumm un schepp o gott o graus

Ne so was stell ich ned aus

Do mensche do hed e Bomb nin geschla

Der bleibd do sunschd muss sich schäme die Fraa

Bei dem Geplerr is es jo ke wunner

Das die Dochder kommd e runner

Ei was hasch Du dann do gemachd

A bisje had se a gelachd

Ned so schlimm dud doch kennem weh

Nemme meiner un saan e wer fun uns zwee

Weil zum Glick is meiner einwandfrei

Ward ich bring ne mo vobei

Jetzt stelle Eich mo vor vun de Mudder es Gesicht

Had sich grad die Kummerträne abgewichd

Die Dochder kommd un fielhd sich noch supper

Do lerne die ned immer sicher is Tupper

Sie hebd ne am Deckel un das is bled

Weil nämlich de Bodem jetzt ab gehd

So sausd der Kuche Richtung Bodem in nu

Un die zwee kenne nur noch gugge zu

Dodzt uff die Fliese und vedehls sich im e weide Kreis

Do kannsche nur noch denge was e "Unglück"

So war fa die der Daa ned besonerschd scheen

Fas Eva und Christiane Hähn

Was mir in meiner Vesammlung jetzt a noch fehld

Is enie der e Krönsche stehd

So wie eier Prinzessin eier Estell

Is echd do e liebi, gell

Die nehm ich vielleichd mo mid uff mei Planed

Weil uff so was bei uns jo a jeder stehd

Als Tollität ich kanns ich eich saan

Mir würde die uff Hände traan

Aber erschd muss ich mo kontrolliere

Ob die a gud dud in Irm Amt pariere

Beim Ball in Derkem wer ich mo gugge

Abber momend die würd die jo faschd gar ned hugge

Bestelld Karde un schreibt se a scheen uff die Lischd

Un domid had se unser Steffen scheen erwischd

Wie der wolld bestelle gehd an die Estell Siren

Hald do ware noch e paar gewehn

Die wolle a noch mid mir feiere

Han ich hald vegess gehad wolld kenner eiere

Jetzt wird die List veschickt und Geld iberwies

Werds de Hoheit im Mag ganz mies

Noch enner vegess ich ganz ned glabe

Schunn wieder muss se zum Steffen trabe

Nobestellung is angesaa

Jo ned es erschde mo war

Endlich is des geschaffd un wird zu sicherheid noch kontroliert

Ei was is dann do passiert

Stehe alle uff Zettel, hann all bezahld

Nur es Estell had zu lang geward

Had all uff geschrieb nur sich selber ned

Ei wold des dehem bleibe in seim bed?

De Vorstand kann dann wieder mim Veband telefoniere

No so viel Anrufe du da sich a nimi scheniere

Gried noch e Platz fa unser Gred

Jetz hoffe ma nur das se es ned vegesst un a mid uns gehd

Vo paar Da wähld se im Präsident un em Vorstand sei Nummer

Ei Mäde jetzt machsche dene Kummer

Wold am Allerheilie am Feida uf Sitzung komme

Ja was had die dann genomme?

Veschob is doch die Vesammlung un iich mach ke Witze

Do dud die doch am Tisch mid sitze

War in Gedanke wohl schon an dem Daa vun heid

Had sich sicher schun gefreid

Das die Fasenachd gehd jetzt los

Un had Angschd gehad es gehd was in die Hos

Doch wie ich Eich do all du kenne

Lose Ihr die ned henge

Stehn all hinner Ihr un ned denebe

Das unser Estell es galaktischi närischie Session dud erlebe

Jetzt kommd was komme muss

Ne ich mach noch ke Schluss

Ens muss ich eich noch zeihe

Die betroffene huggt in eire Reihe

Erzähle kann ma des ned

Zulang wer do wor mei red

Film ab un basse schenn uff

Was ma machd im suff

FILM MAREIKE, haben wir einen Beamer?

Schunn manchi Fraa had sich zum heirade ufgeraffd

Aber ned jedie hads in Ferseh geschaffd

Ja do kansche dich ruhisch vestecke

A wenn se jetzt  Grünagel hesst dun mir unser MAreike endecke

Was ich do alles dufrd erlebe

Ei mei Heimadplaned ach die ganz Galaxie würd vor Lache erbebe

Ihr sinn all fird fa des kommende universum narre Treibe

Ich hoff ich daff bis zum Aschwermittwoch bleibe

Nur ke Sorge (seuje) es wird bestimmt alles Top

Do druff drei Allee Hopp

Un jetzt daff ich noch was mache Kund

Damid es gehd bei Eich a so richdich rund

Were Ihr all do in dem Saal

Ernannt zu Narrenastronauten erster Wahl

Die Veeinigte Planete der Weltraumnarre

Will mid eich gemeinsam ibberirddischi Fasenacht mache

Do dezu gehehrd uff alle Planede un fremde Orde

A e Supernova gleicher Jahresorde

Gemeinsam feire mir mid alle Sorte an Wese

Ob Alien Mensch oder die am Trese

Mir fliehn gemeinsam vun Lache zu Lache

Dun bestimmd ke halbe Sache mache

Un do si na, ens stimmt uff jeden Fall

Ei die erschd Fasenachd war veantwortlih fa de Urknall

Lebt lang un in Friede mid viel Humor

Dann kommd eich des Lebe a ned so langweilig vor

Gebe immer alles und denge ned so viel mim Kopp

Uff die Galaktisch Fasenacht 3 Allee Hopp